उमरगा
मागील 7 ते 8 महिन्यांच्या काळात तहसील कार्यालय उमरगा येथे अनेक शेतीच्या वादाच्या प्रकरणांचे सुनावण्या होत असून यासंदर्भातील निकाल हे वादग्रस्त व चुकीचे दिसून येत आहेत. यात प्रामुख्याने महसूल विभागातील एक अधिकारी समवेत एका लोकप्रतिनिधीचे स्वीय सहाय्यक व वाहनचालक यांच्यामार्फत मध्यस्थी होत असून यात तक्रारदारापैकी एका बाजूने आर्थिक व्यवहार करून अनेक वादग्रस्त व चुकीचे निकाल दिले जात असल्याबाबत शेतकऱ्यांमध्ये कुजबूज सुरू आहे. एखाद्या शेतकऱ्याची न्याय बाजू असली तरी त्याच्या विरोधात निकाल देण्यासाठी अनेक खाजगी एजंटामार्फत आर्थिक व्यवहार सुरू असल्याच्या तक्रारी पुढे येत आहेत. यावर महसूल प्रशासनाचे वरिष्ठ अधिकारी काय भूमिका घेतात याकडे सगळ्या शेतकऱ्यांचे लक्ष लागले आहे. तसेच मागील 7 ते 8 महिन्याच्या काळात अनेक शासकीय कार्यालयात अशा प्रकारच्या एजंटामुळे व मध्यस्थंमुळे आर्थिक भ्रष्टाचार फोफावल्याचे उघडपणे दिसून येत आहे. यामध्ये प्रामुख्याने विविध प्रकरणांमध्ये निकाल लावून देणे असेल, शेतकऱ्यांना शेतात बसविण्यात येणाऱ्या डीपी द्यायचे असेल, शेती मोजणी प्रकरणे, कृषी योजनांचा लाभ अशा अनेक प्रकरणात यात लोकप्रतिनिधींच्या स्वीय सहायक व खाजगी एजंटामार्फत पैशांची उघड मागणी होत असल्याचे अनेक प्रकरणे कानी पडत आहेत.
